america lai chappal :D

गोपाल काफ्ले बिर्तामोड, १५ भदौ । संयुक्त राज्य अमेरिकाको जुत्ता उत्पादक कम्पनी आइकोन सु डिजाइनले विश्व शान्तिका अग्रदुत गौतम बुद्धको तस्वीर जुत्तामा राखेको भनी आलोचना र विरोध भइरहँदा महाशक्ति राष्ट्र अमेरिकाकै बहालवाला राष्ट्रपति बाराक ओवामाको तस्वीर अंकित चप्पल पनि पाइएको छ । जुत्तामा अंकित बुद्धको तस्वीर खुट्टाको माथिल्लो भागमा पथ्र्यो तर ओबामाको तस्वीर पैतालातर्फ राखिएको छ । चप्पलमा उत्पादक कम्पनीको नाम ठेगाना प्रष्टसँग उल्लेख गरिएको देखिँदैन । बिर्तामोडको बजारमा यस्तो चप्पल दुई सय पचासदेखि तीनसय रुपियाँसम्ममा उपभोक्ताहरुले खरिद गरिरहेका छन् ।  विश्व शान्तिको सन्देश फैलाउने नेपालका राष्ट्रिय विभूति गौतम बुद्ध हुन् वा अमेरिकी राष्ट्रपति बाराक ओबामा उनीहरुको तस्वीर जुत्तामा अंकित गरेर उत्पादक कम्पनीहरुले दुवैको अपमान गरेको जानकारहरु बताउँछन् । यस्तो कार्यले धार्मिक, सांस्कृतिक वा सामाजिक अन्तर सम्बन्ध खलबलिने सम्भावना प्रवलरुपमा बढेर गएको उनीहरुको बुझाई छ । एक अगुवा सञ्चारकर्मीले शाक्ति राष्ट्रहरुको अन्तरविरोध जुत्ता र चप्पलमा खनिन लागेको अनुमान लगाए । जसरी अमेरिकी जुत्ता कम्पनीले बुद्धको तस्वीरलाई जुत्तामा अंकित गरेर आफ्ना भगवानको अपमान गर्यो, त्यसैको विरोधमा बौद्धमार्गी बाहुल्य रहेको मुलुकका चप्पल उत्पादकले ओबामाको तस्वीर अंकित गरेको हुनसक्छ, उनले अनुमान लगाए । उत्पादक कम्पनी नखुलेका कारण कहाँबाट यस्तो चप्पल बजारमा आयो खोजीको विषय बनेको छ ।